നടുവേദന (lower back pain): കാരണങ്ങൾ, ലക്ഷണങ്ങൾ, ശസ്ത്രക്രിയയില്ലാത്ത ചികിത്സ

എന്താണ് നടുവേദന?

വാരിയെല്ലുകളുടെ അടിഭാഗത്തിനും കാലുകളുടെ മുകൾഭാഗത്തിനും ഇടയിലുള്ള വേദന, പിടുത്തം, അല്ലെങ്കിൽ പേശികളുടെ മുറുക്കം ആണ് നടുവേദന. ഇത് നടുവിൽ തന്നെ ഒതുങ്ങിനിൽക്കുകയോ നിതംബത്തിലേക്കോ കാലുകളിലേക്കോ പടരുകയോ ചെയ്യാം.

ഡോക്ടർമാരും ഫിസിയോതെറാപ്പിസ്റ്റുകളും സാധാരണയായി ഇത് എത്ര നാളായി ഉണ്ട് എന്നതനുസരിച്ചാണ് വിവരിക്കുന്നത്:

• അക്യൂട്ട് (acute): അടുത്തിടെ തുടങ്ങിയത്; ഏകദേശം ആറ് ആഴ്ച വരെ

• സബ്അക്യൂട്ട് (subacute): ഏകദേശം ആറ് മുതൽ പന്ത്രണ്ട് ആഴ്ച വരെ

• ക്രോണിക് (chronic): ഏകദേശം മൂന്ന് മാസത്തിൽ കൂടുതൽ നീണ്ടുനിൽക്കുന്നതോ, വീണ്ടും വീണ്ടും വരുന്നതോ

സാധാരണ ലക്ഷണങ്ങൾ

• നടുവിന്റെ താഴ്ഭാഗത്ത് മുഴുവൻ മങ്ങിയ വേദനയോ പിടുത്തമോ

• കുനിയുമ്പോഴോ ഭാരം ഉയർത്തുമ്പോഴോ ശരീരം തിരിക്കുമ്പോഴോ ഇരുന്നിടത്ത് നിന്ന് എഴുന്നേൽക്കുമ്പോഴോ കുത്തുന്ന വേദന

• ഏറെനേരം ഇരുന്നതിന് ശേഷമോ രാവിലെ എഴുന്നേൽക്കുമ്പോഴോ കൂടുന്ന വേദന

• പേശീവലിവ് അല്ലെങ്കിൽ മുറുക്കം

• നിതംബത്തിലേക്കോ കാലിന്റെ പിൻഭാഗത്തേക്കോ പടരുന്ന വേദന; ചിലപ്പോൾ മരവിപ്പോ തരിപ്പോ സഹിതം. വേദന കാൽമുട്ടിന് താഴേക്ക് പോകുമ്പോൾ, അത് പലപ്പോഴും അസ്വസ്ഥതയുള്ള ഒരു ഞരമ്പിന്റെ ലക്ഷണമാണ്; ഇതിനെ സയാറ്റിക്ക എന്ന് പറയുന്നു.

നടുവേദനയ്ക്ക് കാരണമെന്ത്?

മിക്കവരിലും, നടുവേദന സ്കാനിൽ ചൂണ്ടിക്കാണിക്കാവുന്ന ഒരൊറ്റ ഭാഗത്ത് നിന്നല്ല വരുന്നത്. ഇതിനെ പലപ്പോഴും നിർദ്ദിഷ്ട കാരണം കണ്ടെത്താത്ത നടുവേദന (non-specific low back pain) എന്ന് പറയുന്നു. സാധാരണയായി ഇത് നടുവിലെ പേശികൾ, സന്ധികൾ, ലിഗമെന്റുകൾ എന്നിവയുമായും അവ ദൈനംദിന ഭാരങ്ങൾ എങ്ങനെ താങ്ങുന്നു എന്നതുമായും ബന്ധപ്പെട്ടിരിക്കുന്നു.

പ്രത്യേക കാരണങ്ങൾ:

• പേശിയുടെയോ ലിഗമെന്റിന്റെയോ ഉളുക്ക് (strain); പലപ്പോഴും ഭാരം ഉയർത്തിയതിനോ, പെട്ടെന്നുള്ള ഒരു ചലനത്തിനോ, പതിവില്ലാത്ത ഒരു പ്രവർത്തനത്തിനോ ശേഷം

• ഡിസ്ക് ബൾജ് അല്ലെങ്കിൽ ഡിസ്ക് തെറ്റൽ (ഹെർണിയേറ്റഡ് ഡിസ്ക്); ഒരു ഡിസ്ക് അടുത്തുള്ള ഞരമ്പുകളിൽ അമരുന്നത്

• ഡീജനറേറ്റീവ് ഡിസ്ക് ഡിസീസ്, ലംബാർ സ്പോണ്ടിലോസിസ്: ഡിസ്കുകളിലും സന്ധികളിലും പ്രായത്തിനനുസരിച്ചുള്ള മാറ്റങ്ങൾ

• ഫേസറ്റ് ജോയിന്റ് വേദന: നട്ടെല്ലിന്റെ പിൻഭാഗത്തുള്ള ചെറിയ സന്ധികളുടെ അസ്വസ്ഥത

• സാക്രോഇലിയാക് ജോയിന്റ് വേദന; നട്ടെല്ല് ഇടുപ്പെല്ലുമായി ചേരുന്നിടത്ത്

• ലംബാർ സ്പൈനൽ സ്റ്റെനോസിസ്: നട്ടെല്ലിലെ നാളി ഇടുങ്ങുന്നത്; പലപ്പോഴും നടക്കുമ്പോൾ കാലുവേദന ഉണ്ടാക്കുന്നു

• സ്പോണ്ടിലോലിസ്തസിസ്: ഒരു കശേരു താഴെയുള്ളതിന് മുകളിലൂടെ മുന്നോട്ട് തെന്നുന്നത്

മണിക്കൂറുകളോളമുള്ള ഇരിപ്പ്, നീണ്ട യാത്രകൾ, കനത്തതോ ആവർത്തിച്ചുള്ളതോ ആയ ഭാരം ഉയർത്തൽ, വ്യായാമക്കുറവ്, ഉറക്കക്കുറവ്, മാനസിക സമ്മർദ്ദം എന്നിവ നടുവേദന വരാനുള്ള സാധ്യത കൂട്ടുകയോ അത് മാറാൻ പ്രയാസമാക്കുകയോ ചെയ്യാം.

നടുവേദനയ്ക്ക് അടിയന്തര മെഡിക്കൽ ചികിത്സ വേണ്ടത് എപ്പോൾ

മിക്ക നടുവേദനയും അപകടകരമല്ല. പക്ഷേ നടുവേദനയോടൊപ്പം ഇവ ഉണ്ടെങ്കിൽ ഉടൻ ആശുപത്രിയിലെ അത്യാഹിത വിഭാഗത്തിൽ പോകുക:

• ജനനേന്ദ്രിയങ്ങൾക്കോ മലദ്വാരത്തിനോ ചുറ്റും മരവിപ്പ്

• മൂത്രമോ മലമോ നിയന്ത്രിക്കാൻ പുതുതായി ബുദ്ധിമുട്ട്

• കാലുകളിലെ ബലക്കുറവ് കൂടിക്കൂടി വരുന്നത്

• ഗുരുതരമായ വീഴ്ചയ്ക്കോ അപകടത്തിനോ ശേഷമുള്ള നടുവേദന

പനി, കാരണമില്ലാതെ ശരീരഭാരം കുറയൽ, മുമ്പ് കാൻസർ വന്നിട്ടുള്ളത്, അല്ലെങ്കിൽ ഉറങ്ങാൻ അനുവദിക്കാത്ത രാത്രിവേദന എന്നിവ കൂടി ഉണ്ടെങ്കിൽ ഉടൻ ഡോക്ടറെ കാണുക.

→ അപകട സൂചനകളുടെ (red flags) പൂർണ്ണ പട്ടിക വായിക്കാം

നടുവേദന എങ്ങനെ കണ്ടെത്തുന്നു

ഒരു നല്ല ഡയഗ്നോസിസ് തുടങ്ങുന്നത് ഒരു സ്കാനിൽ നിന്നല്ല, ഒരു സംഭാഷണത്തിൽ നിന്നും ശാരീരിക പരിശോധനയിൽ നിന്നുമാണ്. Maana Spine-ലെ അസസ്മെന്റ് സമയത്ത് നിങ്ങളുടെ ഫിസിയോതെറാപ്പിസ്റ്റ് ലക്ഷണങ്ങളും ആരോഗ്യ ചരിത്രവും ചോദിച്ചറിയും, നടുവ് എങ്ങനെ ചലിക്കുന്നുവെന്ന് പരിശോധിക്കും, ഞരമ്പുകൾ, ബലം, റിഫ്ലക്സുകൾ എന്നിവ ടെസ്റ്റ് ചെയ്യും.

സ്കാനുകൾ എപ്പോഴും ആവശ്യമില്ല. ഞരമ്പ് ലക്ഷണങ്ങളോ, അപകട സൂചനകളോ, പുരോഗതിയില്ലായ്മയോ പ്രത്യേകമായ എന്തെങ്കിലും സൂചിപ്പിക്കുമ്പോൾ MRI-യോ എക്സ്-റേയോ ഉപകാരപ്പെടാം. സ്കാനുകൾ എപ്പോഴും വേദന വിശദീകരിക്കുന്നുമില്ല: ഒട്ടും വേദനയില്ലാത്തവരിലും ഡിസ്ക് ബൾജ് പോലുള്ള മാറ്റങ്ങൾ പലപ്പോഴും കാണാറുണ്ട്. അതുകൊണ്ടാണ് നിങ്ങളുടെ സ്കാനുകൾ എപ്പോഴും നിങ്ങളുടെ ശരീരം യഥാർത്ഥത്തിൽ എങ്ങനെ ചലിക്കുന്നു എന്നതിനോടൊപ്പം വിലയിരുത്തുന്നത്. സ്കാൻ ആവശ്യമാണെങ്കിൽ, ഫിസിയോതെറാപ്പിസ്റ്റ് അത് നിർദ്ദേശിക്കുകയും കാരണം വിശദീകരിക്കുകയും ചെയ്യും.

→ സ്പൈൻ അസസ്മെന്റിൽ എന്തെല്ലാം നടക്കും

Maana Spine-ൽ നടുവേദനയ്ക്കുള്ള ചികിത്സ

ഞങ്ങളുടെ വ്യക്തിഗതമായ, ശസ്ത്രക്രിയയില്ലാത്ത Precision Spine Care (ഓരോരുത്തർക്കും അനുയോജ്യമായ സ്പൈൻ കെയർ) പ്രോഗ്രാമായ Maana Spine DTX™ വഴിയാണ് നടുവേദന ചികിത്സിക്കുന്നത്. നിങ്ങളുടെ പ്ലാൻ അസസ്മെന്റിൽ കണ്ടെത്തുന്നതിനെ ആശ്രയിച്ചിരിക്കുന്നു.

Assess: (വിലയിരുത്തൽ): വേദനയ്ക്ക് പിന്നിൽ എന്താണെന്ന് കണ്ടെത്തുന്നു, അപകട സൂചനകൾ ഒഴിവാക്കുന്നു, നിങ്ങളുമായി ചേർന്ന് ഒരു പ്ലാൻ തീരുമാനിക്കുന്നു.

Decompress: (ഡീകംപ്രഷൻ): നിങ്ങളുടെ വേദന ഡിസ്ക് ബൾജോ ഹെർണിയേഷനോ പോലുള്ള ഒരു ഡിസ്കുമായി ബന്ധപ്പെട്ടതാണെങ്കിൽ, പ്രത്യേകിച്ച് കാലുവേദനയോടൊപ്പം, കമ്പ്യൂട്ടർ നിയന്ത്രിതമായ സ്പൈനൽ ഡീകംപ്രഷൻ പ്ലാനിന്റെ ഭാഗമായേക്കാം. വേദന ഡിസ്കുമായി ബന്ധപ്പെട്ടതല്ലെങ്കിൽ, അല്ലെങ്കിൽ ഡീകംപ്രഷൻ നിങ്ങൾക്ക് അനുയോജ്യമല്ലെങ്കിൽ, പകരം മറ്റ് ചികിത്സകൾ ഉപയോഗിക്കുന്നു.

Restore: (ചലനശേഷി വീണ്ടെടുക്കൽ): മൊബിലിറ്റി, ചലനം, ശരീരനില, ഫിസിയോതെറാപ്പിസ്റ്റിന്റെ മേൽനോട്ടത്തിലുള്ള സ്ട്രെച്ചിംഗ്.

Strengthen: (ബലപ്പെടുത്തൽ): നടുവിനെ താങ്ങുന്ന ബലവും സ്ഥിരതയും വളർത്താൻ, Level 1 മുതൽ Level 4 വരെ ചിട്ടയായി മുന്നേറുന്ന വ്യായാമ പദ്ധതി.

Empower: (സ്വന്തം നട്ടെല്ലിനെ സംരക്ഷിക്കാൻ പഠിക്കൽ): ഇരിപ്പ്, ഭാരം ഉയർത്തൽ, ജോലിസ്ഥല ക്രമീകരണം, ഉറക്കം, സജീവമായിരിക്കൽ എന്നിവയെക്കുറിച്ചുള്ള പ്രായോഗിക മാർഗ്ഗനിർദ്ദേശം; സ്വന്തം നടുവിനെ എങ്ങനെ കൈകാര്യം ചെയ്യാമെന്ന് നിങ്ങൾ അറിയാൻ.

Maintain: (പുരോഗതി നിലനിർത്തൽ): പ്രോഗ്രാം കഴിഞ്ഞ് 1, 3, 6, 12 മാസങ്ങളിൽ നേരിട്ടുള്ള ഫോളോ-അപ്പ്. 1-ാം മാസത്തെയും 3-ാം മാസത്തെയും ഫോളോ-അപ്പുകൾ പ്രോഗ്രാം ഫീസിൽ ഉൾപ്പെടുന്നു; 6-ാം മാസത്തെയും 12-ാം മാസത്തെയും റിവ്യൂകൾക്ക് പ്രത്യേകം ഫീസ് ഈടാക്കും.

നിങ്ങളുടെ അവസ്ഥ അനുസരിച്ച്, ഒരു DTX പ്രോഗ്രാമിൽ സാധാരണയായി 60 മുതൽ 75 മിനിറ്റ് വീതമുള്ള 15 മുതൽ 25 വരെ സെഷനുകൾ ഉണ്ടാകും.

→ Maana Spine DTX™-നെക്കുറിച്ച് കൂടുതൽ അറിയാം

ഗവേഷണവും ഗൈഡ്‌ലൈനുകളും പറയുന്നത്

അടിത്തറ വ്യായാമമാണ്. നടുവേദനയുടെ ചികിത്സയുടെ കേന്ദ്രത്തിൽ വ്യായാമം, സജീവമായിരിക്കൽ, സ്വയം പരിപാലനം എന്നിവയെയാണ് ക്ലിനിക്കൽ ഗൈഡ്‌ലൈനുകൾ സ്ഥിരമായി വെക്കുന്നത്. ഉദാഹരണത്തിന്, യുകെയിലെ National Institute for Health and Care Excellence (NICE) വ്യായാമ പ്രോഗ്രാമുകൾ ശുപാർശ ചെയ്യുന്നു; സ്പൈനൽ മൊബിലൈസേഷൻ, മസാജ് തുടങ്ങിയ കൈകൊണ്ടുള്ള ചികിത്സകൾ വ്യായാമം കൂടി ഉൾപ്പെടുന്ന ഒരു പാക്കേജിന്റെ ഭാഗമായി മാത്രമേ ഉപയോഗിക്കാവൂ എന്നും ഉപദേശിക്കുന്നു. ഓരോ DTX പ്രോഗ്രാമിന്റെയും ഭൂരിഭാഗവും വ്യായാമവും റിഹാബിലിറ്റേഷനുമാണ്.

സ്പൈനൽ ഡീകംപ്രഷൻ: പഠനങ്ങൾ കാണിക്കുന്നത്. അടുത്തിടെ ഡിസ്ക് ഹെർണിയേഷൻ ഉണ്ടായവരിൽ ഡീകംപ്രഷൻ കാലുവേദനയും ഹെർണിയേറ്റഡ് ഡിസ്കിന്റെ വലിപ്പവും കുറച്ചതായി 2022-ലെ ഒരു ഷാം-നിയന്ത്രിത പഠനം (sham-controlled trial: യഥാർത്ഥ ചികിത്സയെ, പ്രവർത്തിക്കാത്ത ഒരു താരതമ്യ ചികിത്സയുമായി ഒത്തുനോക്കുന്ന പഠനം) കണ്ടെത്തി; ഫിസിയോതെറാപ്പിയോടൊപ്പം ഡീകംപ്രഷൻ ചേർക്കുമ്പോൾ ഗുണങ്ങൾ മറ്റ് പഠനങ്ങളും കണ്ടെത്തി. ഡിസ്ക് ഹെർണിയേഷനും കാലുവേദനയും ഉള്ളവർക്കപ്പുറം ഫലങ്ങൾ മിശ്രിതമാണ്: കാലുവേദന ഇല്ലാത്ത, ദീർഘകാല നടുവേദനയുള്ളവരിൽ നടത്തിയ 2009-ലെ ഒരു ഷാം-നിയന്ത്രിത പഠനം അധിക ഗുണമൊന്നും കണ്ടെത്തിയില്ല.

നിങ്ങൾക്ക് ഇതിന്റെ അർത്ഥം: നിങ്ങളുടെ നടുവേദന കാലുവേദനയോടുകൂടിയ ഒരു ഡിസ്ക് പ്രശ്നവുമായി ബന്ധപ്പെട്ടതാണെങ്കിൽ, ഡീകംപ്രഷൻ നിങ്ങളുടെ പ്ലാനിന്റെ ഭാഗമായേക്കാം; എപ്പോഴും റിഹാബിലിറ്റേഷനോടൊപ്പം. വേദന ഡിസ്കുമായി ബന്ധപ്പെട്ടതല്ലെങ്കിൽ, നിങ്ങളുടെ പ്രോഗ്രാം വ്യായാമം, ചലനം, നിങ്ങൾക്ക് യോജിക്കുന്ന മറ്റ് ചികിത്സകൾ എന്നിവയിൽ ശ്രദ്ധ കേന്ദ്രീകരിക്കും.

→ ഡീകംപ്രഷൻ തെളിവുകളെക്കുറിച്ചുള്ള ഞങ്ങളുടെ പൂർണ്ണ അവലോകനം വായിക്കാം

നടുവിനെ പരിപാലിക്കാൻ

ദൈനംദിന നടുവേദനയുള്ള പലരെയും ഈ പൊതുവായ നിർദ്ദേശങ്ങൾ സഹായിക്കുന്നു. നിങ്ങളുടെ വേദന കഠിനമോ, നീണ്ടുനിൽക്കുന്നതോ, ആശങ്കപ്പെടുത്തുന്നതോ ആണെങ്കിൽ, ഇവ ഒരു അസസ്മെന്റിന് പകരമല്ല.

• ചലിച്ചുകൊണ്ടിരിക്കുക. കിടക്കയിൽ വിശ്രമിക്കുന്നതിനേക്കാൾ സാധാരണയായി സഹായിക്കുന്നത് ലഘുവായ പ്രവർത്തനങ്ങളും, കഴിയുന്നത്രയും പതിവ് ദിനചര്യ തുടരുന്നതുമാണ്.

• ഏറെനേരത്തെ ഇരിപ്പിന് ഇടവേള നൽകുക. മേശയ്ക്കരികിലാണ് ജോലിയെങ്കിൽ പതിവായി എഴുന്നേറ്റ് ചലിക്കുക. → ഡെസ്ക് ജോലിയും നടുവേദനയും: സഹായിക്കുന്നത് എന്ത്

• ശ്രദ്ധയോടെ ഭാരം ഉയർത്തുക. ഭാരം ശരീരത്തോട് ചേർത്ത് പിടിക്കുക; ഉയർത്തുമ്പോൾ ശരീരം തിരിക്കാതിരിക്കുക.

• പതുക്കെ ബലം കൂട്ടുക. നടത്തം, നീന്തൽ, അല്ലെങ്കിൽ ഒരു ചിട്ടയായ പ്രോഗ്രാം പോലുള്ള, നിങ്ങൾ ആസ്വദിക്കുന്ന പതിവായ വ്യായാമം കാലക്രമേണ നടുവിനെ സംരക്ഷിക്കാൻ സഹായിക്കും.

സ്പൈൻ അസസ്മെന്റ് ബുക്ക് ചെയ്യേണ്ടത് എപ്പോൾ

നിങ്ങളുടെ നടുവേദന:

• രണ്ടാഴ്ചയിൽ കൂടുതൽ നീണ്ടുനിൽക്കുന്നുണ്ടെങ്കിൽ, അല്ലെങ്കിൽ വീണ്ടും വീണ്ടും വരുന്നുണ്ടെങ്കിൽ

• നിതംബത്തിലേക്കോ കാലിലേക്കോ പടരുന്നുണ്ടെങ്കിൽ

• മരവിപ്പ്, തരിപ്പ്, അല്ലെങ്കിൽ ബലക്കുറവ് എന്നിവയോടൊപ്പമാണെങ്കിൽ

• ജോലി ചെയ്യുന്നതിനോ ഉറങ്ങുന്നതിനോ ദൈനംദിന പ്രവർത്തനങ്ങൾക്കോ തടസ്സമാകുന്നുണ്ടെങ്കിൽ

ഒരു അസസ്മെന്റ് ബുക്ക് ചെയ്യൂ. കൊച്ചി, കോഴിക്കോട്, തിരുവനന്തപുരം, ആലുവ, പെരിന്തൽമണ്ണ എന്നിവിടങ്ങളിലെ അഞ്ച് Maana Spine ക്ലിനിക്കുകളിലും സ്പൈൻ അസസ്മെന്റ് ലഭ്യമാണ്. കൺസൾട്ടേഷൻ ഫീസ് ₹250, ആണ്. ഡോക്ടറുടെ റഫറൽ ആവശ്യമില്ല.

സ്പൈൻ അസസ്മെന്റ് ബുക്ക് ചെയ്യൂ · അല്ലെങ്കിൽ +91 99950 09403-ൽ വിളിക്കൂ